قطتي..!!

قطة او “بسة ” هكذا نسميها في حوران هذا الحيوان الاليف ستعتاد لأن تراه في كل منزل وفي كل مكان ولكن بسة عن بسة بتفرق..ومن هوون لازم تعرفو “كاتي”  بستي المربااية يلي حضرت ولادتها وكانت امها حيواني المفضل يلي كمان انا مربيها يعيني العيلة كلها عاشت تحت ايدي ابا عن جد…

 صراحة لا أذكر المرة الأولى التي ربيت فيها قطة ولكن يخبرني من أكبر مني في عائلتي  أنني منذ صغري وفي ربيع عمري كنت أحب هذا الحيوان وكان لي مجموعة من القطط وهكذا الى الان، وقد اكتشفت انني اشاركه في بعض الطباع والصفات التي لربما قد اكتسبتها منه مثل الخجل والفضول والانانية والصمت….في طفولتي جميع من حولي ممن اعرفهم من اقاربي بعمري كان لديهم بعض الالعاب التي كانت تشاركهم الفراش واينما  ذهبوا… اما انا فكانت لعبتي هي قطتي كانت هي المرح الذي اجده بالطفولة…..وطبعا كبرت هالمحبة وصرت المدافع الاول عن هذا الحيوان وهاد سببلي مشاكل بالبيت أحيانا وخاصة عندما أصبح بيتنا مركزا لقطط الحارة كلها , كنت دائما شديد الاعتناء بهم من مأكل ومسكن  ….ومنرجع لعند “كاتي” قطتي او بستي  وهي بستي المفضلة حاليا وساكنة عندنا بالبيت .من بعد ما حضرت ولادتها  وكنت اول مرة بشووف هيك منظر ولعله كان سبب في حبي الشديد لهذه القطة … خصصت مكان بالبيت للعيلة الجديدة وطبعا مع الفطور والغداء والعشى كمان ،هيك لحتى كبروا بس للاسف اخوتها البسس واحد مات بحادث سيارة وواحد هرب .كان المنظر فظيع يومها ولم يبقى لكاتي غيري …. ومن هداك اليوم زادت عنايتي بكاتي واكتشفت فيها شغلاات لاول مرة حتى انها كانت ترد على اسمها ومتى رأتني تركض ناحي و تتلمس بي بس ما بتعض!!!!  وايضا لشدة تعلقها بي عندما تكون جائعة او بدها شي بتيجي على غرفتي وبتخرمش على الباب واول من يستقبلني بالبيت ازا كنت مسافر كاتي وآخر من يودعني هي، تحمل كاتي الكثير من الصفات والقدرات التي لم أشاهدها في باقي القطط ..كانت مميزة بكل شيء ولا تتفاجئوا ازا قلت انها بتتفرج على توم وجيري وبتقعد جنبي لما بكون  بشتغل على النت وما بتتحرك لساعات …تحب اللعب كثيرا وتخريب الأشياء وتكره باقي القطط يلي بالحارة ما بعرف ليش!! وفضولية كتييييييييير لدرجة كبيرة واكيد وأهم شي انها مرباااية…..

واخيرا لعلكم تستغربون أنه بعض مرور سنة ونصف على احتفاظي بكاتي  اكتشفت انها ذكراا وليس انثى.